Hamiləlik testi

Aybaşının vaxtından keçibsə, dərhal hamiləlikdən şübhələnib, aptekə üz tutursunuz? Lakin burada bir vacib məqamı vurğulamaq lazımdır: bəzi sadə qaydalara əməl etmədikdə ən ideal hamiləlik testi səhv göstərə bilər

Testin iş prinsipi     

Bütün hamiləlik testləri sidikdə xüsusi hormon – xorionik qonadotropini təyin etmək məqsədilə istehsal edilmişdir. Bu hormonun qısaldılmış adı XQ-dir. Xorionik qonadotropin mayalanmış yumurtahüceyrənin uşaqlıq divarına yapışdığı andan sintez edilir.

Xorionik qonadotropin                                      

Adətən yumurtahüceyrə mayalanmadan 6 gün sonra uşaqlıq divarına birləşir. Bu müddət ərzində test etmək mənasızdır. Çünki nəticə yanlış olacaq. Zaman keçdikcə isə XQ-nin səviyyəsi sürətlə artmağa başlayır.  

Hamiləlik testini nə zaman edə bilərəm?        

Ovulyasiyadan 8 gün sonra yumurtahüceyrə spermatozoidlə qarşılaşdıqda laborator şəraitdə hamiləliyi təsdiqləmək mümkündür. Bu dövrdə qanda XQ-nin səviyyəsi kifayət qədər olur. Bir neçə gün sonra, yəni mayalanmanın 10-12-ci sutkasında adi testlər vasitəsilə nəticəni görmək mümkündür. 

Hamiləlik testi şəkil

Ginekoloqların xəbərdarlığı

Hamiləlik testi instruksiyasında dəqiq nəticə alacağınız yazılsa da, həkimlər tələsməməyi tövsiyə edir. Belə ki:

  • Ovulyasiya aybaşı siklinin 10-14-cü günlərində baş veribsə, mayalanma anından yeni siklə qədər minimum 13 sutka keçməlidir. Bu müddətdə aparılan hamiləlik testi 2 xətt göstərəcəkdir. 
  • Xatırlatmaq lazımdır ki, bəzi hallarda ovulyasiya müxtəlif səbəblərdən ləngiyə bilər. Məsələn, ovulyasiya siklin 22-ci günündə baş veribsə, növbəti aybaşı vaxtından minimum 7 sutka gecikmə olmadan heç bir hamiləlik testi düzgün nəticə verməyəcək. Belə hallarda hamiləlik testi tək cizgi göstərəcək.
  • Aybaşı sikli 28 gündən çox və ya az olduqda qarışıqlıq yaranır. 

Bu səbəbdən düzgün nəticə əldə etmək üçün aybaşı gecikməsi zamanı ya həkimə müraciət olunmalı, ya da minimum 7 gün gözlədikdən sonra hamiləlik testi aparılmalıdır.